Friday, January 23, 2009

Khatiang Hun Kha Kan Thleng Ve Ta Chiah

Tunlai chu kan fapa, kum thum leh achanve mi, Sikul kaina tur hlir hi rilrua a cheng tlat pek a. Kan nupa a, nausen anih laia, kan lo lei sa Kolkata School Directory hi kan chinglet hneh hlein ka hria. English Medium ho zawng kan han thlang phawt a, a dawt a West Bengal Board hnuaia mi kan paih leh a - Tichuan CBSE leh ICSE hnuaia mi hlir kha thlangchhuakin, lehkhabu phek chhinchhiahna sen ngat nen phek tinah kan thil zel a. Hna zualpui chu kan zo thawkhat anih hi mawle ti chungin kan han innuih leh rih thin a. Kan Nu leh Pa te khan hetiangin an ti ve angem aw tih kan sawidun zing hle.

Ka hnathawh lai hi sawn theih reng dinhmuna awm anih avangin Central Board ah ngei kal se kan ti deuha. Central Sikul a nih chuan, quota kan neih bawka, laklawh deuhin hmundangah pawh min sawn mahse a pawl ngaia a su leh theih mai dawn a. Mahse CBSE nge ICSE thazawk tihah hian kan buai leh thin - Thenkhatin ICSE an tih lain a thenin CBSE an ti leha, a bo theih map map khawp mai. Engle khawle kan awmna hnaih apiang a tha a ni mai tiin thu kan titawp ta a - CBSE hnuaia mi an lo ni ngeia. A pawi hranpa em em lo e Kulkhut kan chhuahsan hnai tawh tho e tiin nimin khân kan chhungkua in, phur takin admission form lachhuak turin , kan tleh phei ta ham ham a.

Lucas-a pawh a phur khawp mai - Mal khalh tih taka puitling emaw a intih thin avanga kum khat leh thla sariha Kindergarden luhtir tawh kha ania - Yaas School ka kal duh tawh, I love schooool tiin thawhhlim atang khan a au chelchul tawha. Kendriya Vidhyalaya leh Army Public School hi kan hnaih berte anni. A hmun pawh a nuamin a fai khawp mai - Sipai ho nge nge engkim hi a nihdan tur ang thlapin an tithei zel, amaherawchu rawngrut ho leh lubawk chin an hah ngawt ang - âk zat hnih hnuailam chin tân khawilai hmun mah hi a nuam tak tak thei ngailo.

Naupang ho chawlhlawk lai tak kan nangching palha, an bengchheng ngei mai - Lucas a lah an inkhel a han zawm ve leh nghal mai peka. Mahse vanduaithlak takin Preparatory class a lut turin kum li leh achanve chauh an lo phal a . A Birth Certificate - Helamah chuan Kolkata Municipal Corporation pek chhuah chiah an pawma, computerised vek a ni bakah cheng za chawiin copy khat zel a lâkchhuah theih reng - an en vang vang hnua Lucas-a an han thlek leh thin 'Pumrua leh thluak chuan a tlin mahse kum in a tlinlo ti niawm ziazangin'. February thlatawpah kum li leh a chanve a tlin chuan kan pe thei ang an ti ta a - Pathian ningawt lo tân chuan kum khat han punbelh tir chu thiltheih ni hek lo le, lunghnur takin kan haw leh a.

A ngaite in a sikul luhna pangaia kan han kaltir leh dawn chu a ni phawt mai. Hmabâk hi a la ko teh e, Nursery em pawh a la thlen hma atangin chhungkua in kan buai chu a ni si a le !! Mahse le hetiang hun thleng ve thei tur a Pathianin min veng hi a lawmawm e - Naute chumchiap a nih laite kha Hmanlai angin kan sawi ve thei ta.

6 comments:

burgerstud2005 said...

CBSE/ICSE/WB Board.a zirtu zir hi a ni e.Calcutta chu school kha a tha lo hlom em alawm maw le.LMB leh St.James kha zia khop mai.

EPISTEMOLOGY said...

epis ka nia..blog i nei tih ka lo hre lova..rawn len luh fo tur nih hi..!

Unknown said...

@burgerstud2005: Central Board kan duh nachhan chu insawn thei reng chi kan nih vang a ni e. Bakah pawl zirlai balhlah zawngin a awm theih lo a - Hmun dangah pawh insawn mah ila pawl ngaia a zawm leh mai theih dawn vang a ni e. Kulkhut ah chuan kir leh ka tum lemlo, hnatawh a harsa tek tek emai.

St. James chu ka hria alawm mahse April-June velah Kulkhut ka chhuahsan dawn si a, han hnutchhiah mai ka duh lo ani. Kei hi Hostela seilian ka nia, ka lo tawn tawh ang kha tawntir ve ka duhlo - Mahni kawtchhuah ngeia hian lehkha chu zirzo se ka ti.

Unknown said...

@Hruaia: Pu Epis thlalak thiama kha i ni maw. Lo leng lut fo rawh - Kan Khua, han ti ila, South Vanlaiphai thlalak i rawn pholan kha mawi ka ti khawp mai - A piah deuha khan ka Ni te In a awm asin :)

virgochhas said...

awiii...in thlen chin thleng ve tur khan keini chu beih feeeeeeee a la ngai ... :D

Unknown said...

@Ramnghaki: Election a pawn a thlengchho thuai mai ang. A fin hmel khawp ka ti, Lucas a ang maiin a sam a tam lehnghala -Folic Acid i eitam aniang :)