Khatiang Hun Kha Kan Thleng Ve Ta Chiah

Tunlai chu kan fapa, kum thum leh achanve mi, Sikul kaina tur hlir hi rilrua a cheng tlat pek a. Kan nupa a, nausen anih laia, kan lo lei sa Kolkata School Directory hi kan chinglet hneh hlein ka hria. English Medium ho zawng kan han thlang phawt a, a dawt a West Bengal Board hnuaia mi kan paih leh a - Tichuan CBSE leh ICSE hnuaia mi hlir kha thlangchhuakin, lehkhabu phek chhinchhiahna sen ngat nen phek tinah kan thil zel a. Hna zualpui chu kan zo thawkhat anih hi mawle ti chungin kan han innuih leh rih thin a. Kan Nu leh Pa te khan hetiangin an ti ve angem aw tih kan sawidun zing hle.

Ka hnathawh lai hi sawn theih reng dinhmuna awm anih avangin Central Board ah ngei kal se kan ti deuha. Central Sikul a nih chuan, quota kan neih bawka, laklawh deuhin hmundangah pawh min sawn mahse a pawl ngaia a su leh theih mai dawn a. Mahse CBSE nge ICSE thazawk tihah hian kan buai leh thin - Thenkhatin ICSE an tih lain a thenin CBSE an ti leha, a bo theih map map khawp mai. Engle khawle kan awmna hnaih apiang a tha a ni mai tiin thu kan titawp ta a - CBSE hnuaia mi an lo ni ngeia. A pawi hranpa em em lo e Kulkhut kan chhuahsan hnai tawh tho e tiin nimin khân kan chhungkua in, phur takin admission form lachhuak turin , kan tleh phei ta ham ham a.

Lucas-a pawh a phur khawp mai - Mal khalh tih taka puitling emaw a intih thin avanga kum khat leh thla sariha Kindergarden luhtir tawh kha ania - Yaas School ka kal duh tawh, I love schooool tiin thawhhlim atang khan a au chelchul tawha. Kendriya Vidhyalaya leh Army Public School hi kan hnaih berte anni. A hmun pawh a nuamin a fai khawp mai - Sipai ho nge nge engkim hi a nihdan tur ang thlapin an tithei zel, amaherawchu rawngrut ho leh lubawk chin an hah ngawt ang - âk zat hnih hnuailam chin tân khawilai hmun mah hi a nuam tak tak thei ngailo.

Naupang ho chawlhlawk lai tak kan nangching palha, an bengchheng ngei mai - Lucas a lah an inkhel a han zawm ve leh nghal mai peka. Mahse vanduaithlak takin Preparatory class a lut turin kum li leh achanve chauh an lo phal a . A Birth Certificate - Helamah chuan Kolkata Municipal Corporation pek chhuah chiah an pawma, computerised vek a ni bakah cheng za chawiin copy khat zel a lâkchhuah theih reng - an en vang vang hnua Lucas-a an han thlek leh thin 'Pumrua leh thluak chuan a tlin mahse kum in a tlinlo ti niawm ziazangin'. February thlatawpah kum li leh a chanve a tlin chuan kan pe thei ang an ti ta a - Pathian ningawt lo tân chuan kum khat han punbelh tir chu thiltheih ni hek lo le, lunghnur takin kan haw leh a.

A ngaite in a sikul luhna pangaia kan han kaltir leh dawn chu a ni phawt mai. Hmabâk hi a la ko teh e, Nursery em pawh a la thlen hma atangin chhungkua in kan buai chu a ni si a le !! Mahse le hetiang hun thleng ve thei tur a Pathianin min veng hi a lawmawm e - Naute chumchiap a nih laite kha Hmanlai angin kan sawi ve thei ta.

Kan Kum Sawmna

Hun leh Ni te hi a inher chak ngei e - Hriatloh kar ah kum sawm alo tla der tawh mai!! Chung Pathian venhimna zarah hetiang hun lawmawm tak, dam leh hrisela, chuangkai thei dinhmuna kan awm avangin a hmasa in lawmthu ka sawi phawt e. Tin, heta lo lenglut zawng zawngte hnenah Kumthar Chibai ka buk bakah Duhsakna Sangber ka hlan bawk a che u.

Hmanlai, han ti ngawt ila kum sawm chauh a la ni a, deuh tawh a thil thleng kha vawiin chu kan tarlang mai mai teh ang. Delhi khawpuia, khawvel ka ta emaw tih lai leh engkim titheia kan inhriat lai, zirlai ni anga ka awm hunlai a mi daih tawh kha a ni. Ka hluihmel tawh viau lo maw - Hlui lah lo e a. Rilru hi, kum sawmpariat bawr vel nih lai ang khan, a la tharlam reng mai. Ka thil ziah tum ang deuh hian a hlui tawh emaw hmanlai an chang zo ta tih theih kha a ni tlat lo a.

Awle, kum sawm kal ta khan Vanlalruati sak ngei 'Mimang kan piang hmun ta si lo' tih hla kha a takin ka tawng ve ta anih kha - A hla thuah pawh helai hi ka duhzual bik, "Ka lam hawia i seih hianin, Ka tan khawvel a par leh thin". Khuanu in a zawng leh a dil tute pe hauh silo a, Kei bengkhawn em em lo leh biahthu hlan dan pawh thiam em em lo a kha, min thurchhuak ta nalh alawm. A pawimawh ber chu rilru inhmuhtawn leh inkawmngeih hi a ni berin ka hria. Roxette hla ah pawh, "It's the small small talks, That makes it all happen" antih ngei kha, tawngkam nemduai leh thlumtak hi lehlamin an chuti teh lua lo aniang ka ti hnuhnawh ta e.

Mahse hetiang zawng zawng aia pawimawh zawk - Eizawna kawng dap hunlai - khan min tlakbuak tlat peka. Duhtak te nena Bahra Khur Laih tihzawng phairama awm ta sa sa a Thangtlawm thlak deuh bawk alawm le. Pathian malsawmna avangin a kum leh a kan han hmurual ta ngeia - Keiin tuna ka thawlai hmu in Mussoorie ah Trainning turin ka chho a; anin Jet Airways ah Cabin Crew/Stewardess hmu in Mumbai ah Trainning tur bawkin a liamthla ve ta nghal a. "Kar hla di zun a uai chu, Tawrh thiam a har ngei ka tan, Dar ang tawn leh ni nghakin, Zan mut reng ka chhing theilo" leh "Mahriak awm khawhar zual changin, An awmlo thinlai hnemtu.." tih hlate kha, a taka han tawn ve meuh chuan, a lo va dik ngai em!!

Kum hnih tal tap hmunkhatah kan cheng dun leh ta miah lo a!! kum thum na ah Delhi lamah a rawn insawn leh theih hlauha, kei pawh Ghaziabad-a ka awmlai alo ni kher bawk nen. Mahse kan chawlhni reng reng kha a insulpel leh ta tlata, "Khua hmunah leng mah hian bawihte, Intawn ni an nghakhlel thina" tih Daduh-in a sak ngei ang khan!! Chumi chhapah Kolkata a awmturin min han dah lehta nghala - Hmunpui zawnga ka awm hrehna ber mai ah khan. Hmelhriat vang nen lunglen ana duh ngei mai - 'Sawiin a siak lo' tih hranghlui tena anlo tih thin kha a tak ngialnganin ka tem tawh ani ti ila, ka daw lo ang. Layover an neih ni te kha ka hrechiang thin hle - The Oberoi, New Market a thleng thin anni bawka saw hmun ngat saw chu ka hrechiang na ngang mai; Lunglen zual ni deuha ka teihawina thin ani bawka. Khaw hmunlo induhtawn te awm dantur hi tu hrilh lem ka ngai lo e - Ka lo tawn ve tawh ngei ani.

Khun fe a kan in ngaihtuah hnuah, ngialnghet leh huhang nghah zawk, sawrkar hnathawk zawk chu min fin a remti in a hna chu a bansan ta nghe nghe a - Kut kan insuihve theita nge nge a. A inpekna avangin ka lawm hle - Khang hunlaia sing fe hlawhve tawh khan ka hlawh tlemte ringa kan Quarter chhete min luah lumpui a duh avangin. Duhlo se zawng chhingkhual lanu, Bazaar arpui thau zawn ang ngawta, nupui atan zawnga feh chhuah kha ka hmabak a ni miau si a. A la naupangin a rilru pawh ana ve thin ngei alawm - A luh rualpui ten New York, Singapore, London tih angreng an tlawh tan laia englem ti loa nilenga ka office ban nghaka lo thut ngawt pawh chu!!

Heng avang te hian tun hnu, kum liam tawh ta te leh fanau neih hnua, ka han thlir let leh hian Hmangaihna an tihfo hi min hriatthiam tir phahin ka hria. Jerry McGuire a Film a, "You...You complete me" a tih khan a hrilfiah hleiin ka hria. A ni keini pawh, chhiah leh tha ah pawh, inti mawitawn tura insuih kan ni a - A bik takin kan nu hian min ti 'Famkim' ani. Hei ngei hi hmangaihna an tih, kum sawm chhunga ka lo dawn leh pêk ve a chu - A hlui theilo a, a hmanlai theilo a, a thi theilo bawk. Love songs a kan nupa duhber 'Love me tender' - Elvis a phhuah ngei - ah khan a hrilfiah berin ka hria: -

Love me tender
Love me sweet

Never let me go

You have made my life complete

And I love you so.

Love me tender

Love me true

All my dreams fulfilled

For my darling I love you

And I always will.

Love me tender

Love me long

Take me to your heart

For it's there that I belong

And we'll never part.

Love me tender

Love me dear

Tell me you are mine

I'll be yours through all the years

Till the end of time.

(When at last my dreams come true

Darling this I know

Happiness will follow you

Everywhere you go).