Kan Pafa In

Masi thla zet zawng chawlh a tlem ngei mai, ni 9 leh 25 chiah hi chawlh kan neia - Puja thla kha a ngaihawm duh khawp mai. Urlawk ni lah Restricted Holiday anih dawn avangin kumtir atanga ka lo dahthat ve tang tang Restricted Leave pakhat ka la neih hi ka hmang mai ang chu ka lo ti deuha. Thil awm khat tak hi hriatchhuah a harsa ngang aniang niminpiah kha chawlh ani tih ka lo theihnghilh der tawha. Mahse kan mut hma deuhin ka hrechhuak leh hlauha a lawmawm angreng hle - Ka thiltih hmasak ber pawh Remove Alarm Clock tih hmeh kheuh kha ani ngei e.

Keimah ai maha ka chawlhve thin tuma nuam lo ti em em chu ka fapa tereuh hi ani. Nilengin Pogo leh Cartoon Network hi min thlirpui a tum ziaha. Mahse tuntum chu thlasik rim boruaka a nam chiai chiai tawh avangin Varendah ah thutdun kha kan thlang ta zawka. Hmuhnawm titakin mi chitin chitang leh lirthei chi hrang hrang insulpel sung sung kha kan thlir dun renga. Eng engemaw mai mai sawia kan titi dun theihve viau tawh avangin a lungawi thlakin a nuam angreng hle mai - A nikhua chho sawt ve tawh khawp mai.

Tihtur em em thildang a awmloh avangin a thil duhzawngte ka Click-III in ka hmehsak vea. A lawm thiam khawp lehnghal, a bik takin an Principal nu neih ang Hyundai i10 ka hmehsak phei kha chuan ring takin a 'WOW' nasa khawp mai!!. Tichuan chaw eikham reife hnua pawh kan la thuta renga. Mahse lenchhuah a duhtak tlat avangin, kei awm mai mai chak bawk khan, lenchhuah aia tiin inchungah ka chhohpui zawka.

Inchungah pawh khua anuamin alo duai ve tawh khawp mai le - Nipui vanglaia nisa leh boruak uap churh avanga Heat Stroke hlauhlai ang kha chu hlate khua anni tawh e (Inchungah kan chho khat tihna ani lemlo ania aw). Ball kan keng chho bawka tlai ninem thlengin kan inkhel dun zar zara, a khat tawkin thla kan la reng bawka. Thiltih nuam tak leh manhla tak ani mahse tih zen zen theih ani thin tlatloa. Kan thlalak zinga laktlak pawlte chu hengte hi anni e (Mimal thlalak chu tilang lo mai ila).

A biru daih Leh duk duk sia

Thanmawh Bawk

Nimin chawhnu hmaa Rajarhat piaha kan office saklai mek ka va enthlithlai zet chu thilmak deuh deuh ka va hmu teuh mai. Kan kalna hmun tur hming lam a harsa deuha driver ka zawh chhen a ngai lehnghala - Nabadinganta thum deuha Bengali awphawi ditaka maia Nabodingonto anti leh lek phei chu ka bo lehzual sauh. Mizo tawng taka khaw daifem piah ami ani bawka kawng pawh vawihnih ngawt kan bo tak kha le. Kawng lah chu an khu em em a, kan hmaa lirthei tlanten antih khukluih emaw tih mai pawh a awl rum rum - Honda Civic khalh khu zet Sardarji pa lek phei kha chu a huathlala awm ngawt mai.

A hmun hi IT Sector, New Town Rajarhat atanga rawn thangchho zel hian ala huap vek dawn avanga kan hotuten hmunruak leilawk annia. Kawng tluanin in, sang fe fe, sain anlo buai mup mup maia. India ram khawilai hmun pawha aiawhtu neithei Bihari kuthnathawk pawh anlo tam nangiang mai - Kawngsirah eng ilo zuar pawhin an kat nuk tho. Ka sawitak Bihari ho hi an tuarchhel ngang mai - Chaw kawpuar hmumang hleilo hian nilengin hna an thawk theizel mai a. Khualzin hnathawk tih takah an awmna-te lah chu Chhuran chakai kawmkawraw-a thlam zuk din atum ve ringawt kha ani ringawt (An awmna sawizawm lo in thilmak ka ti deuha khan pakai chho mai ila).

Hnathawkte Riahbuk (Ziaawm pawl tak)

Vaiho hrim hrim hi zun leh ek chungchangah chuan hmasawn theilo pawl tak anni tih hi tupawn kan hai loa - An hnam upat tawh tehreng nen hian mahni inbul anih loh phawt chuan kawngsirah mawnglang kunga thut vung pawh pawi anti lemlo khawp mai. Kan trainning laia village study nei tura Karnataka kan kal tuma khaw luhna kawng awmchhun liau liaua mihring ek ngei mai lo awm hnur kha ka mitthla-ah hian a reh theilo - A rim uih zet leh ten chung chunga, survey neih ngaitlat hek, a fai deuh lai zawn pahfawma chhuk en ngaitlat kha aw !!

Amaherawhchu ka han hmuhtak nena tehkhin chuan khangte kha chu nepte ala ni. Dil lianzet mai hi alo awma, heng ka sawitak Bihari ho hian Ekin atan lo hmanga mawle (A hnuaia thlalak te hi en mai la). Sangha an awm ani chek ang chu - a hnuaia an zuang ri pawm pawm thawm ka hre tlata - mahse ek lang nawlh nawlh chu hmuhtur a awm hauh thung lo (Sawizawm lo mai ila). Pumpui so bat bat chungin, "Vanneihthlak mange Andhra Pradesh chhuak Sangha chauh kan ei-a" ka ti rilru neuh neuha. Hmanlai deuh tawha fiamthu nana Mizo Contractor pakhat kum hnih tal daih tur thingtlanga ek-in han sa tura an tirh; ani a han kal vang vanga dap a khawr sauh sauha a hnuaia vawkte panga a thlunge antih kha rilrua a rawn lang vawng vawng thei mai alawm.

An Inthiarna

Sang vehvawh tak ani

Zun leh ek inthiardan atang hian hnamzia hi zir a awlsam khawp mai - A changkanglo apiang hi an inthlahdah chawk. Hmanlai kan pipute pawh kha daia an kal mai thina, ka daikal/dai-kal dawn antih kha chuan a chiangtawk hle thin. Mahse tunah chuan hun a inher danglama, changkan-na ten min tlakbuak tak avangin daia kal ngai lo in inthiarna hmun kan nei tawha - Tawngkauchheh pawh lo danglamin ka inthiar dawn kan ti mai tawha. Mahse keini aia hnam upa zawkte hian an nunzia hi an thlak danglam chuanglo chu anih hi mawle. An 'History of Ancient Indian Civilization' - kum 5000 chuang tawh ani tia an ziah kur nguai hi - dawt muhlum emawni chu aw tihmai a awl duh dawn khawp mai. Bihar ngat phei hi chu Chandragupta Maurya a thuthmun, a khawpuiber pawh Pataliputra - Patna antih tak hi - ani miau sia. Heng avang te hian nge mawni le India hi a than chak loh em em ni - Zun leh Ek inthlahdah te hi an thanmawh bawk emawni chu aw !!

Thla Khi

Pipute khan thlapui khi an hmang tangkai ngawtin ka ring - Tunlaia pawh meichher ken vu vu zawng a remchang tehchiam lo emai. Naupang pawnto pawn nuam antih phahve thoin ka ring bawk - Pawnto ka hmuh hmasak ber phei chu Darzo khua ani nghe nghe. Torchlight ala chhuak awm siloa thla khi awmlo se chuan Ai-Mit Thlawn antih ang hlauh hi anniang mawle - Tlangval leh Tar leng haw han inchhuih khat khat tur mithla-ah a lang tlat mai.

Vanneihthlak takin ka pian ve meuh chuan torchlight an hmu chhuak tawha, thingtlang han zin pawn pheikhai a zang riau tawh. Ka Pu damlaia khawthim thet theta torchlight nena a chhuak ziah thin kha aw - Ka Pi kha a boral hma em atin ni - mahse ka chhun lo hlauha zana lenchhuah hi nuam ka ti em em hranpa lo. Eng pawh changkanna avangin an nei ve tawha mahse a chhiat zin em avangin torchlight lukham hnuaia an la dah fir fer tho mai. Battery zawh lampangah phei chuan thla eng bawk ani an hman leh thin - Inhmun hrang/huainei, ka nite lo awm tawhna, zawnah phei kha chuan a va han tangkai tak.

Rinloh deuh maiin kumin chu boruak a thiang tha bawka arsi a hmuhve theih tlat mai, mahse thlapui a bo daih thung - A rawn inher chhuah leh ngei beisei ila. Khalama awmtan chuan in zantin hmuh ania ho pawh inti maithei mahse keini tan chuan 'hmuh ngai loh hmu' antih ang ki deuh kha ani ringawt. Pollution vang hian khua hi a thiang tak tak thei loa, heng boruak kan han nei theite hi a lawmawmin sawi a kai ve reng reng. Vai naupang pawh van rawng mahni ngaihdan theuhin hnawih rawh ule antia - Grey colour zuk hnawih veka. "An va han mawl hlawm" tidawn ila piantirh ata an nitin hmuhve dan ani miau sia !!

Thlapui engtikah tak rawn inher chhuak leh ang maw ka ti rilru neuh neuh thina. Ka rilrua rawn lang leh thin chu pitarte phhunchiar deuh an hla , "Tunlai thanghthar-te hi thla-ah ka lawne te intia, inti englo zo vek tawh anih hi" kha ani leh thin. Dikna chin tepawh a awm mahna helam phairam angahte chuan - A en loh phah em em loa mahse boruak thianghlim chu changkan-na, kan ti mai dawn nge, vang hian a awmloh phah alawm. Ka thlalak phochhuah a pawh hian a var pup mai - khawilai riangvai a hian nge maw chhawrthlapui kan hmuh tehlul ang le.

Thim thet thet

Chakai

Thlasik-a chakai an thau thin tih hrerengin hmanni chu kan han vak khawthawnga. Beisei lawk ang ngeiin chakai alo awm hlauh mai peka. Fur zawh hnua kan ei kha rinaiin a tui lemlo bawka, tuntum chu a pawnfen kan han bih ngeia - A tui pailai ngei mai kan duh sia. A zuartupa Bengali-pa pawn chu chu hrerengin, "Saab, Ladki he tel bi zaada hoga" alo ti sawt sawta. Mahse a nu hlang vek chu duh aia alo to deuh avangin kan han indawn hmasa te te a, kilo khat-a cheng 130 in a phal ta hram-a. An lian lemlo na-a mahse buk anlo tlo khawp mai, kilo 3 pawh eng thuartham chu ani lemlo khawp mai - Plastic Bag tereuhte-a zuk leng veka. A sawngbawlna pawh a hmun ngeia a awma mahse tul kan tih lemloh avangin inlamah tih atan kan hawnpui ta zawka.

Nghak rei tawh bawka ka ei leh ta nge nge

A damlaia-a awmdan tur ka hisap vel mai mai

Hmanlai atang tawh reng khan chakai hi Mizo thawnthua a lang tamin ka hria. Chhurbura Pawih ram zin Aium tui ti lutuk theihnghilh hlau si, "Aium, Aium..." tichung renga Sawntlung nal-a tlu han theihnghilh zuita khan ka nuih chu a tiza ngang mai. A hnua hlaah an phhuahzui ngei mai pawh kha, a hla thute erawh chu ka hre nil nial tawh chauh - Naupan laia ka Pa'n thawnthua min hrilh kha ani ve mai. Mahse Pawih-pa'n, "Aium rimte chu i nam ang vetvuta" a tih hnua a hrawk a zuk kawm ngheng kha chu ka la hrechiang khawp mai.

Hei ai maha ka nuihpui tamzawk chu Utawk leh Chakai inhau mawlh mai kha ani. Hmanlaiin an tia lawm hemite pahnih hi tihian an inhaua antia lawm: -

Chakai (Utawk hnenah): "Hmuiziahkur, Zangkaihkulh".

[Utawk/Toad chhan ngaihna leh tihngaihna hrelo zaksi khan Uchang/Frog, Lawyer nilai ngei mai kha a han ruaia. Anih lah chu a suit eng ha in a rawn ni piat mai lehnghala]

Uchang (Utawk hnenah): Tuin maw hau che?

Utawk(Uchang hnenah): "Saw, sawta saw a intam kan tho saw".

[Chakai lah chuan seh chak tak maiin alo intam kang hru peka]

Uchang khan ti hian Chakai kha a hau ta e an tia lawm: "Ruh chungnung(2), Kaihza thlep tam, Ek chhipchhuan, Nghawng lian, Mit pawng, Beng bul, I kal saisir ang haw haw-a"

He thawnthu atanga kan zir: "Miin i chunga antih i duh ang bawkin mi chungah va ti ve rawh u" tiin an han tlip ngei a.

Uchang khan a sawi dik hmel fu

Ngaih Ang Ngawt Hi Ani Ngailo

Kan inhmuh tirh kha chuan engang mi nge tih leh engang rilru pu nge tih kha kan inzir tawn dun nasa ngawtin ka hria. A mak hranpa lemloe, a chhanchu ka hmaa lo thawk tawh ten hepa suahsual thiamzia leh lulhlul zia hlir kha an sawi chamchi sia. Chulo renga pawh Bengali ho ka nin tawngkhawng lai kha ani tlata, hnathawh peih loh vanga kawhmawh bawl nuam han tih em em hi tun thlengin a hrilhfiah dan leh hrilhfiah ngaihna hi ka la hre thei thlawtlo ani.

Rabindra Sarobar Lake-ah

Kan awmna hmunah

Mahse a mihringa hriat chian hmaa ngaihdan lo siamfel sa ngawt hi alo diklo leh thin. Tu ka sawi lo - Ka Driver ka sawi ve mai ani e. Ho angreng tak mahse ka nitin nunphung hrechiang ber tu leh min sawichhe theitu ani ve tlat. Helamah phei chuan pawimawh tak anni - Mahni lama tantir thei turin Union ho nen hian kan inchuh ani ber e. Keia tan lek phei chuan a pawimawh lehzual - Staff zinga senior ber annih tlangpui avangin mi tha leh misual, Posting Order siam dawna pawimawh em em - min hrilh theitu anni tlat. Ka Driver hmasa kha chu belchhung a sa hminsa, Pu Lalhluna lo khawizal tawh, kha ani tlata.

Rin anglo takin Pa tawngtlem leh fel em em, nau ang tak taka kan Nupa min enkawltu ani ta daih thunga. Ka Fapa a pianlai pawh khan sawi ngai miah loiin a tulna hmun apianga a tlan bakah zantin mamawhna thut a awm taka tiin khum pawh awmlohna a rawn riak phei ziaha. Tuna min sawn hnu pawh hian ka Fapa leh ka Nupui chuan anla ngai hle, engkim mai hi ka office hlan pawn alo tihfel sak dim diam thin. Helaia Mizo tamtak aiin ka ngaina, hnamdang leh hna hnuaihnung zawk thawk pawh nise.

Ka sawitum tak zawk chu hnamdangte pawh hi mi tha tak tak leh hriatreng tlak anlo tam khawp mai. Bakah mi hi tawngpawng namnul ngawt tur annilo. Mihring mihrinna angin tupawh biangbiak thiama an chungah kan that tel bawk hi chuan tumah hi kan lakah anlo sual ngai em em lo - Heihi kan Sakhuana leh kan Hnam nunphung nen a inmil ngawtin ka hria. Taka a hming chu Raj Kumar Dey ani e mahse Raj Da tiin kan chhungkua chuan kan ko thin. Kum thum leh a chanve ngawt kan inhrawn hman. Khawvelah hian zirtur hi alo va han tam tak em!!

Tizawng Hian Han Inthlir Ve Ila

Hmanlai deuh tawha khan he thu 'Mizote hian BA ngawireng kan ngah tawh lutuk' hi a lar thin riua kha. Tunlai thangtharte tan chuan nuihzatthlak lamah pawh a kal mai thei awm e mahse a dik ve miau sia. Ram anla daizau tawk loiin Spoken English hmanna hun an nei tamtawk lote pawh ani mahna - Mizote hi Ramdanga pawh a huhoa awmkhawm let let nuamti em em Hnam kan ni tlata.

Mahse han chhut neuh neuhin khangho kha English Composition leh Mizo tawng diktaka lehlin a nana na chuan keini thangtharte hian kan khan awmlo mange aw ka ti rilru thin. Entirnan chawplehchilhin Essay Competition hi han neita ngat ila, English leh Mizo a ziah ngei ngei ngai bawk se, kan buai awm mange. English leh Mizo thiam fe fe chu kan kat nawkin ka ring mahse a pahniha sawiselbo khawpa ziak thiam tur hi chu kan vang ngawt thung ang. Ni e tunlai thangthar English ngeia thusawi thei/nal fe fe chu kan tam mahse kan tawngkauchheh diktaka let chhuak leh thei chu an vang tawh ngawt ang - J.F.Laldailova anga English to Mizo leh Vice-Versa thiam kawp hi chu kan vang tawh awm teh e, Vana Rah kan ti law law mai dawn emi !!

Keini ho hian a eng chiah hi nge maw kan zir chhuah ve le !! Kan tawng tibahlah tawk lekin English Mediuma kan zir chhoa - Mahni rilru puakchhuak sawi dawn ilang English thumal telh angai zel sia maw!! Mahse kan zir ber English lah mahni tawng ani titur khawpin chuti em emin kan thiamlo leh ang lawi si. Tu Mizo ber kher hian nge English-a rilru suangtuah ngai reng reng ni. Duh pawh kan duh ngut loang Identity Crisis intanna bul ani tih hriain 'Mizo kan ni kan hmel atha' tichungin kan tang leh tung tho ang !!

Hui Ham !! Hetianga kan tawng leh kan zir ber English pawh thiamtha fumfe lo hian India Ramah an hman lar ber Hindi Tawng, thiam tak tak an awm tih chu ka phalo mahse mipui mimir lam ani ka sawizawk ni, hi kan han thiam teh lul ang ni. Kan nu leh pa ten Vairampura min thawn thlakin rualawt lo leh hnianghnar tawk turin min chawm alawm. A hmasaber a kan sawi ang khian kan inlawm khawmin inti Indian-lo leh Western em emin kan khawsa ho leh dial diala. Thenkhat hnathawhna hmute an awm hlena, thenkhat mi neinung deuh fate an sumdawnna enkawl turin an hawa, thenkhat englem niloiin kutbengin an haw ve bawka, thenkhat Vairampura sumdawng ve turin an lo kala mahse tawng thiamlo nana na chu Vai hoiin anlo Bechhawchhia. He tawng hi kan thiam a tul tak meuh ani - Silchar pamawl te nena insumdawn tawn nan leh Kolkata vela bangbo-lo tawka chakkhai rawn lam nan nen. Taxi (Bihari Raj Bhasa/Hindi tawng hmang ho khalh deuh vek anni asin, English chu khawilamah ) lak nan tal pawh a tangkai khawp mai - Anih loh vek chuan Pahari (Tlangmi) mawl deuh bum awlsam tak tura, hmanlai chhuak BA Ngawireng i ngaih ang chiah khan, anlo ngai dah ang che!!

Tun atanga kum sawma pawh he Cycle hi ala kal zel angem aw keini Mingo ngaisang em em Hnam mahse a thalo lai hlir entawn-te zingah hian. A tlip nan chuan hei hi chu a chiang bel bawlin ka hria : -

"Keini thingbul lungbul delh loa seilian te hian hmanlai mite kha kan tluklo hul hual ani. Anni kha chuan Sum lama harsatna-te leh Rualawhna-te paltlangin an Mizo-na ti dal miah loin an insiam puitlinga. Mahse keini ve lem hei aia Rahka sang deuh kan mamawhlo maw - Ram changkang zawka an tih ang chu zawngina min entawn hnua a thiam ve zel ang deuh hian kan thiam dim dem tih erawh chu hairual ani silo. Silhfen leh Thawmhnaw manto tak tak, English-a thu fumfe sawi hleitheilo, leh Mizo tawng English thumal kai nena kan inthuam chhung hi chuan a tak ram kan thlen hmel meuh loh ani hi".

Kan Inzirtir Dan Hi

Hman Chawlhni ka fapa kum 3 mi Sunday Sikula kan han kai pui meuh chu thil min ngaihtuah thui tir hle mai. An thupui sawi tum ber chu "Kristiante Khawvela an tih duhdah zia leh harsatna an tawh hnemzia" tih ania. An hotunu khan "Korean Films in en ngai em" tiin an tan a, naupangte khan "Aw" anlo tirual dial a. Kum zabi fe kalta khan Korea hi Japan in a awp tih a sawi tan ta a. Mahse Khawvel kalphung dik loh avangin Communist hote North Korea an chak taa tiin a chhunzawm zela. North korea a Kristiante an tih duhdah leh tih hreawm an nihzia lantir nan heng tehkhin thute hi a sawi ta a: -

1. Naupang pahnih sikul kal lai pawh Communist sipaiten an Sakhuana an phatsan loh chuan thah an niang tiin an vau a. A upa zawk chuan "Kan phatsan ai chuan thah kan thlang e" ati ta reuh a. Tichuan an unau in an kaphlum ta hmiah a. An Pa in a hriat veleh "Ka fate chuan phatsan aiin Martyr an thlang " a tita daih a.
2. Chhungkua pakhat pawh heng sipai vek hian an Sakhuana phatsan turin vau leha. Pa ber chuan fate ngaihtuah avangin phatsan mai pawi a tih loh thu a sawia. Mahse Nu ber chuan "Phatsan ai chuan hei aia hmun nuam zawka kan kal dawn tho" a ti ta tlat a. Tichuan a nungchungin an phum ta vek a.

Ban dawna "Tunge Martyr ngam ve" tiin zawhna a zawta mahse naupang ho an ngawi ta thap thung. Kristian nih leh thah mai nih an hlau tan ringawt ni berin ka hria. Kan naupan lai kha chuan Kristiante huaisenzia hlir kha kan zir thin kha ania - Daniela leh a thiante huaisenziate kha ka ngaihtuah chhuak ta neuh neuh a. Kristian nih kan chakin kan inchhuanpui thin hle laite kha!!!

Heng naupang chumchiap leh rilru thianghlim takte zinga 'Tih Duhdah' leh 'Thah' tih tawngkam han tuh ngawt chu tha ka ti lo lemlo hle. Madrasa vela sawitur niawm takin ka hre zawk mah mah - Sakhaw dang huatna leh tih boral dan hengho hi chuan an tuipui ber sia. Kristianna chuan 'Nun Zahawmnate' leh kan 'Mihringpui Huat Lohna te' min zirtir ani in ka hria. Tin, Khawvel Sakhuana a hian a tam ber dawttu kan nih mai bakah hmun hrang hrangate hian 'Tih Duhdah' leh 'Suatmang' em chu kan la ni rih lo bawk!!

Tunlai Boruak

Tunlai boruak han inthlak dangdai vel hian tlang hrileng tamtak chu a ti hluar hle mai. Nimin pawh ka hote pakhat Malaria a vei avangin a haw tawpa. Hritlang, Khawsik tih ang reng veia damlo an tam em avangin naupang nei tan phei chuan in uluk tluk a awm lo. Mahse Chikungunya lar laia Kolkata khaw pawna awmten Chicken anlo nghei ang ngawt kha chu ka tilo deuh. Anni hi an hnam a upat ve tawh em avangin fing fea kan ngaihtur te pawh hian ngaidan maksak tak tak hi an nei leh nulh thina - Evolution pawh hian 'Back Gear' a nei niawm tak ani !!!

Zingah Newspapers han bih lahin inthah, pawngsual, inrawk, doctor ho nuar tih vel hian a tial buaia, han chhiar loh theih nisi lo chu hun hi kan khawhral leh ringawt thin. Mamta Banerjee lahin Singur a Tata Company in diklo taka ram rauk tia 400 acres lai mai sawrkar atanga a neih avangin August Thla tawp lama nawrh alo tum thul nen - Khawvel hi chu Mihring vang hian a pik ani deuh ber mai. Strike leh Bandh apianga 'Control Room' thut ngai ziah leh ka ninzia hi han hre ve teh se chuan 'Lainat Na' vang tal pawhin a in hnukdawk duh awm mange tih mai mai te hi suangtuah a awl duh ang reng khawp mai.

Mahse heng borual ipik lutuk kara hlimna leh rilru nawmna hmu ve thei tur hian Khuanu in alo duang lawk leh zan thin - Mihring lawmna leh hlimna te hi chu a ho angreng em bawk atin ni. Boruak a thiang tha in khaw hawi anuam leh tan ta hle - Carpenters ho sak 'Top of the World' leh hla dang dangte han faifuk raih raih a nuam leh ta.

Thlai leh Mihring tan Ruah tui tur
Chhimbal kan hmuh ve teh khiah chu

Tih chi tak ani

Lucas with Pop at Victoria Memorial

Lucas with Mom at Victoria Memorial

Khawpuia hnathawh hi chu a hahthlak ngei mai - Inrinni leh Chawlhni hi engtikah tak rawn inher chhuak leh ang maw tih ringawt hi kar tluanin rilrua a awm reng ni berin ka hria. Zirtawp hlawh lak ni nise baka Thawhtan hi chawlh han ni leh ngei bawk se a va nuam lehzual dawn em. Zirtawp zan a duh tawka han men a Inrinni a tlai tak thawh nuamti ve em em thin kha ka ni ve tlat a - 'Suangtuahna Khawvel' lampang thil ani mah mah tawh zawk !!!!

Amaherawhchu chhungkua nih tawh chuan a dan hi a dang ta deuh. Inrinni hi 'Bazaar' ni lo zuk ni renga - a tuk biak in kai ni lo ni leh zel nen. Nupa tan hian thil thar zir zel tur hi a lo va tam em. Mahse mahni hnar hawina lam zawnga he 'Khawvel' kalpui thei ta hi ka la hre bik lem lo e !!!!

Mahni hma sial miah loa nupui fanaute tana hun pek ve te hi 'Mizo Pa' tam zawk te hian kan hrelo tlangpui chu alo nih hi mawle. Chhungkuaa han vah thawlen tih ang reng te hi lo tih ve ngei ngei tur hi alo ni a. Hemi ka hriat chhuah na hi ala rei vak lo - Ka Fapa kum hnih a chuang hman der tawh. Mahse tih miah loh ai chuan tlai khaw hnua tih hi a hlut dan a danglam, a chhan chu rilru a puitling chho ve zel tih na ani - Ka Nupui leh ka Fapa hlim em em hmel ka hmuh khan 'Famkim' sawt in ka inhria.