Monday, July 13, 2009

Kan Tân July Ni 19 Khi

Kum li lâi a vei ta dêr mâi, khami tûk ang rênga, hlimna leh hlauhthawn rukna avanga, helhhawlha taka ka awmdân ang kha ka la hre ngai hauhlo e. Chawlh ka la bawka tukthuan pawh eitha fumfe hleilo in ka liamphei vat a. Ka kalna tur pawh ka thleng hmâ khawp mai, dâr 9:30 atangin nghâkhlel tak leh hlauthawng tak chungin patlinga pumpa kha kan ding khup ta zûi a. Mahni kuta han chinfel chi lah nilo chu, ka mi chân te kha ka nghâk ta ngawt ngawt a. Chumi chhapah zan hmasa lama mutmu hmuh meuh loh avâng tepawh ani chêk ang chu, mutchhuak leh riltam avangin ka ni deuh muai muai lehnghala.

Minit khat lek pawh damchhung daih ani an tih kha maw, ngeni ka Khawlhring dawhtheih lohna mizia (Ka Nu hi Khawlhring Hnam ani) kha a chhuak zawk aw - Hun kha kalmuang ti lutukin ka vei sek mai a. A tawpa tawpah chuan kawngkhar a rawn inhawng ta hlawl a, ka hming ngeiin min rawn au ta lauh lauh mai a. Lo beisei rûk leh tawngtaina a chham ang ngeiin chanchin lawmawm tak leh Ka nupui pawh engkim a that thu min hrilh ta mial mial a. Hlimna avanga rilru zângkhâi takin 'Incubator' awmna lam ka panphei ta nghal a. Tichuan, Pathian malsawmna avanga he khawvel, July 19, 2005 zing dâr 10:58 a, min rawn hmuhpui ve tu kan fapa - Lucas Vanlalhriata Chhangte - chu ka mit ngeiin ka hmuve theita a.

Hâng thelthawl tak leh sam ngah fa hi ani reuha, mahse fu-ke kim a neih avangin lungawi lohna ka nei hauhlo - Pâ tak tak ka ni ve tawh tlat alawm, naupiang 38 zinga mipa awmchhun kha ani bawk nen.
Chanchintha Luka hmingchawia phuah niin, a Mizo hming hi a Christian hming nena inzul tura saksak ani e. A hming hi ka Ni ina a pian hmâ daih tawha a alo phhuah tawh anih avangin a pu nghala - Mizo dânah chuan rual u hmu hmasaber tuten hming an phhuah thin, ralkhat atanga hming inphuahsak hi thianglo anga ngaih ani. Chuvangin ka pawhin, rokhawlhna avanga a rawn kal theih tâk loh avangin, mipa lak atanga a 'Tu' neih hmasakber chu hming a phuahsak thei ta biklo a. Amaherawhchu, Ka piantirh ata min awm tleitu ka Ni hming phuahsak hi tha kan ti em em tho mai.

Mahni inluma kan han lut leh chiah chu le, naupang ber ve ve innei tih takah nausen enkawl dan kan lo hre tlem dûn khawpa, mahse eng titih in emawni inzir chho chungin kan tithei ve naw naw zela. Nu leh Pa nih hi thil awlai tak zawng alo nilo phawt mai, han nih ve meuh chuan hriatloh lûat avanga insit châng a tam duh khawp mai. Thinthi thiapa mutmu tuah a vângin, Lucas-a nawmsam loh deuha, laina hnaivai awmlo nen, mangan nikhua châng pawh a awm thin tehmeuh mai - Zirtur hlirin hmalam hun hi a intiang urh chu ani ber e. Bengali 'Ayah' rawih mai aia mahni kut ngeia chawilen kan tum bawk si a, a tawi zawngin kan buai nupa thin ani ti mai teh ang - Nausen nena inkungkaihna siamna thaber chu mahni ngei inhnimhnaih hmasak tir hi ani.

Pathian zârah naute thangduang tak leh tlei tak ani chho reuh a, thlaruk a tlinchhoh chin atang phei chuan a keyboard hmet ri tleng tlengin tuktin zing dâr 5 bawr velah min tiharh ziah ta mai a. A pianchampha hmasaber kha chu a hrelo tawp ang le, mahse a dawt lehte pahnih kha chu a hre riairuai in ka ring. A thiante pianchampha lawm chânga thil te te rawn hum haw tat kha nuam a tih thin em avangin Montessori, a sikul kalna thinah, tumhnih ngawt chu kan lawmsak nghe nghe a. Kum khat leh thla sarih anih in Montessori Sikul ah kan luhtir a, malkhalh leh puitling pahnih kâra seilian chho ta chuan naute leh naupang dang te a nuihzat tan tlat vâng ani deuh ber e. Sikulah pawh a harh chungchuan avangin hremna a tawk zing khawp mai, class an lâk lai han bihrûk châng te hian a thu hle hle hmuhtur kha a vâng thin reih rawih khawp tak e. Mahse tunah zawng a changkang deuh ta bawka, eng engemawni thiamthar hi a rawn nei ve leh nawlh thin - A bik takin 'Swimming Class' an neih tum hichuan sawitur a nghah thin hle.

Tuntum chu a duhzawng kimchang taka a sawitheih tawh vâng leh a tawngkam thiamthar - "I love surprises and gifts" - tih a hmanzin tâk em avangin hnunglam atanga sabarh kan tum deuh a. Hlimhmel tak leh lawm deuh maia kan biang an fawp tur mawlh han suangtuah in, khawvelah hian engdang mah min awh/ngaih tir lo e, a manhlâ ve hrim hrim dawn tlatin kan hria. Damte a chung Pathian venhimna leh malsawmnate dawngin, kum tam te lo liamin tumawngbeng pawh lo ni mahila, hemi ni kher hi chu kan hlimber leh manghilh ngai loh tur ani - An advance Happy Birthday to you, Dear Lucas. May there be many more in the years to come
by, albeit the Almighty's blessings.

B'Day urlawk ni
A nuam tihber na hmun - McDonald's
A hlim khawp mai

23 comments:

Geminiboyz said...

Fapa tha tak ni turin enkawl zel la, ZO ZIA theihnghilh lo turin. Tun bak hi chu k rawn lut khat dawn em mai, HAPPY BIRTHDAY advance for Lucas

A_es said...

Vana-an-rah sen tek anga hmel tha leh fel fapa i nei hi chu 'ka awt che' ka ti duh ang em aw!! :)

3rd paragraph-a 'Chritian' i tih khi vawi 3 ka chhiar nawn a, Christian tih tur ziah sual mai2 ani tih ka hre chhuak. phhuah/phhuahsak i tih chhen poh khi phuahsak tiin chhiar mai ila a hahdam :)

Unknown said...

@Geminiboyz: Nia, kan lo tum ange. I lo lenglut a ka lawm reng reng e :)

@A_es: Patlinga pumpa min tihlawm dan i thiam hmel riau mai :D

Christian tih chu ka siamtha e, mahse pakhat zawk hi chu awm mai mai teh se. Bandh avangin tukin zing dâr 4 atangin ka la meng renga, ka mutchhuak tawngkhawngin ka chhusual teuh ang, min lo ngaithiam zel aniang chu :)

Sekibuhchhuak said...

Fapa i nei hmeltha hle mai! A pa nge anu a chhun aw? :-)

burgerstud2005 said...

Lucas V.Chhangte chu a cute reuh khawp alawm..a hmelthareuh a,Hmana ka sawi tawh ang khan a nu a chhun a nih ka ring.

Happy Birthday Lucas ka ti e...Chuan nangmah ang turin enkawl la.Khawvel thil tak leh thlarau lam thilah poh duhsakna ka hlan a che.

Clayton Dolién said...

ka va tlai chheh chhawh tak em.. Lucas chu dam reng rawh se.. blog lamah hian ka lut khat lutuk maw le

Unknown said...

@sekibuhchhuak: Tehhlawl chuan aw. A pâ le, i ti lawmawm e, lo lenglut fo teh kha :)

@burgerstud2005: I ti lawmawm e. A pâ a chhun mawle..LOlzzzz...

@dolien: Tlai chhe lo e, ka lawm reng reng e.

ARMY said...
This comment has been removed by the author.
alexxfender said...

Kei ni ve chu, zing dar 3 vel ah hospital min kal pui tawh mai rawh a ti in min kaitho chawp a.. peih lo zet in ka tho a, kan va thleng phei a.. an han buaipui deuh sap sap a, ni chhuah hnu ah pawh a la nei ta lo a..
Hei rawn en rawh.. a lu a lang tawh, an tia, ka va en zuai a, a lai hrui i chep chat duh em an tia.. duh hran lo, ka ti leh a.. a hnu lawk ah, an sang trang trang a, a rawn pawk chhuak nawlh mai a, doctor khan a thlauh trep in ka hria a... ka lo trim uaih a.. an trap ve raih raih chu a nuam duh phian.. naute piang hlim chu mahni fa mah ni se, hmelchhia ka ti khawp mai a... awi a hmelthra lutuk an tih te hian.. in va ti der peih mai mai, thra in tih tak tak tawp lo kha.. a nih loh dan pui kha sawi kher a ngai lo, tiin ka rilru in ka lo chhang zut zut zel.. an han thrang chho zel a.. a aia naupang hmelthra hi ka la hmu leh ta miah lo thung..

mnowluck said...

Happy Belated birthday Lucas, We share the same birthday.

Varte said...

kei pawh Lucas b'day chu tlai zetah ka han lawmpui ve ang e, surprise a lawm bawk a, ka rawn surprise a nih hi.

A hmel hi chu a tha ve chiang ngawt mai, hetiang fapa chu nei ve dawn ila ka nei duh ve lutuk zuuun... ser sawr nekin!!!

Unknown said...

@ALEXXfender: Zing pentawng chunga thawh chu..Lolzzz...Nia, i sawi ang deuhin naupianghlim hi an chhe reuh khawp mai.

@mnowluck:Thanks for dropping by, and Happy belated B'Day from all of us.

@Varte: A lawmawm reng renge. Fa duhawm tak ila nei ve dawn alawm :)

Dave said...

Ka ron lut zuai...ka hriat thiampui khawp mai che bawk in a. Tlai hle tawh mahse kan happy birthday ve nge. Naupang thu awih tak leh fel tak nih zel ka beisei.
-Dave.

avena said...

Phentea chu fapa i nei lian tawh hle mai a..i hmel ang lo hlauh a a vanneihthlak hle mai..zemabawk tlangval la ni mai tur...bongs ho bul a sei lian atan chuan a uihawm ang reng let ling hle mai a!

virgochhas said...

Belated Happy Birthday, Dear Lucas...

chhangte, fa neih hi a lo huphurhawm tehlul nen a va han hlimthlak tak em tiraw....

Unknown said...

@mccloud: Hming i va nghah teh duah ve, ka lawm e.

@avena: Phenthang ka hmel hi a chhe reng reng hleinem...Lolzzzz...Zemabawk ah a la vei ve tauh tauh dawn alawm. A lian ve tawh khawp mai - 3.5 ft @ 16.5 Kgs ani tawh e.

@VC: Ka lawm tho e. Nia, hlimawm tak ani, an tello chuan khawvel a kim thei tak tak lo e.

Mizohican said...

eee Happy Belated Birthday to Lucas. Ka rawn hmu tlai deuh a nih hi, tunlai chu office ah kan buai lutuk a. Chuan i blog side-bar a min link dan hi. lolzzzzz.

Leh... Kulkhuta McDonald's in la neihloh lai te pawh ka la hre reng. Lucas chu a vannei khawp mai, tunah chuan a lo awm ve tawh a :D

mnowluck said...

@illusionaire:

hahaha.. kima hrahsel :)

Mizohican said...

bleh :-P

Unknown said...

@illusionaire: Ka lawm tho e, i hming ani miau si a..Lolzzz..mahse hmingpum lawl lawl chuan ka ziah loh hi :D

Nia, Kulkhut hi zawng..huissss ani ringawt e. 'Ice Age' leh 'Madagascar' toys hi kan nghah tawh ania. Mahse an thil zawrh hi ka ei ngai eih lo, a tuina hi ka man thlawt lo ani ber mai a.

A_es said...

kei chu ka fel asin aw...E-lu-son-air ka ti thlap bik, kei hi chu kan khuaah poh....... :)

Lal Jo-a said...

tlai tawh viau mahse, belated theih tho e. Happy Birthday Lucas. A hmel a fel ven vawn khawp mai, kid atan a that dawn hi. Lo dam zel rawh se...

Unknown said...

@Joseph L: Ka lawm reng reng e. I kid anih chuan kekawr mawngtet a ha ve ange..Lolzzzzz...