Wednesday, October 21, 2009

Hun Kaltawh Thlirlet Na

Hmanni thlalâk hluite ka haichhuak vela, rinai takin ka lo nghah daih mai a. Kum te a lo liamin hmel tepawh alo dang ve ta deuhin ka hria, mahse thil lawmawm ber erawhchu a vâng zawngin ka la thang miah lo hi ani. Ka Batchmate pui leh thenawm pa reng hi a kiar tha tawh mai a, ala upat bik loh tehreng nen.

Tichuan, ngaihtuahna te a kal thui zela, thiante nena inhmuhkhawm hnuhnun ber kha 2003 daih alo ni reng tawh mai a. Thlalâkte ka bihchian hnu in thlaleh, training tur avanga, inhmuhkhawmna ah kan zavai in kan kim theih dawn ta lo ani tih ka hrechhuak leh a. Hnadang thawk leh te chu thuhran nise, kan zingah pakhatin min boralsan tâk vâng ani zawk e.

Sikkim a Trekking tum

Kan zinga ka kawmngeih ber leh ka roommate zeuh tawh thin, Tlangval Shihoi Bokato Sema, chuan 5th January 2005 khân, Assam Circle zawm tirh leh Quarter hmuh hma siin, he khawvel hi min chawlhsan a. Chanchin ka hriat tirh chuan 'Lungphu chawl' an ti bawk si a, min thawngin mak pawh ka ti hle a. 'Foundation Course', Mussoorie ah lah khan 'Cross Country Record' reitak lo awm tawh tichhetu leh 'Excer' peih deuh ani bawk si a !! A peihzia chu Bangalore a 'Probation' kan neih lai (A hnuaia ding zinga dinglam ami nen hian) pawhin 'Inspcetion Quarter' chhungah tlânna a awmloh avanga inchhunga tlân zar zar thin kha ani a.

Sitting (L-R): S. Bokato Sema leh Keimah

Fiamthu thiamtak leh Pathian mi deuh ani bawk e, tlaiah hian 'Tennis' kan khel dun ziah a - Kan khelh hnuhnun ber khan 6-4, 6-3 in ka chak tak e, zanriah ei dawnah, "Man, you can still run like a twenty years old" min ti nghe nghe a. Vaiho zinga kil ve lo in, kan pahnih in ka kildun zing hle - Vawksa kha a ruk te in kan eizing khawp mai !! Mahni hnathawna hmun tur theuha kan liam hnu khân a hnathawhna, Puri (Orissa), atangin January 2004 khân min rawn tlawha.

Kei ka la parawl bawka, kan pahnih in rawngte bawl in kan titi tui hle a - Ka bialnu, tuna kan Nu, chanchinte thlengin tui takin kan sawidun a. Chhunah Howrah Station atangin Seerampoore kan pan a, a nau Pastor zirzote ni ropui tak chu kan va hmanpuia. Zanlamah kan thianpa tho, Kekhrievor Kevichusa, te inah zanriah kan ei a - Kan hawng tlai bawka, in neitute ei hnuah kan ei pek a. A tukah a kalna turah motorin ka thlalhliama, mahse kan inhmuh tawp na ani tihchu kan hrelo ve ve in ka ring. A kum leh zing thawhhlima, JNU-a a thianpa leh tunah IFS ni ta Robert Shetkintong Dilbung- an, a boral thu phone-a min rawn hrilh zet kha chu hrilh a hai duh ngei mai !!

Hun reife chu ka mumangah ka hmu fo a, min be lemlo in a thinrim hmel em em thina. Mahse a hmingchawi ngeia 'Running Trophy' kan buatsaih hnu leh kan hotu tena an chhiarchhuah tura a chanchin - Rajesh-a, IP &T Service, rawn chunga - kimchang thei angber a ka han thawn hnu khân, ka hmu leh ta ngai miahlo thung. Kum alo liama, thlalak en ngaihloh nen, thiante lakah ka leibat ka tlingta tawh emawni te ka inti thin. Mahse ka thian kawmngeihte zingah chuan tun thlengin ka la chhiara, nui chunga ngaihtuah chhuah châng ka nei zeuh zeuh thin.

Mahse hei inhmuhkhawm alo hnaia, ka rilruah hun kal tawhte a rawn thar leha, kan inkawm laite kha ka mitthla leh thin. Pindan khat kan luahdun laia zingkâr class kaltur hmanhmawh em em laia, a insingsa rei thin lutuk ka hauh thin leh thildang dang ani deuhber e. A kalna hmunah a hlim ngei ka beisei in, hlim taka kan inkawm thin laite kha a hriatchhuah ve ngei ka ring ve bawk e. Inhmuh leh hma loh zawng hlim takin le, thianpa Bokato.



15 comments:

amuana said...

Ka thiantha tak takte hi ka chan nual tawh, kan sangawi zawnpui, thu chhia thu tha engkim kan hrilh, a thlum a al kan tlanpuite'n mi an boral san hi chuan awmngaihna hriat hi a har duh khawp thin asin.

I dinhmun hi ka hrethiam khawp mai. Ka thian famta te hi keimah chauh a ka awm lai hi chuan rilru a kawm mawlh mawlh changte ka la nei thin. :) I thianpa thlarau chu hahdamin chawl rawh se

avena said...

training hun ah pawh chuan in sawi ho hmasak pawl anih dawn chu maw le..a zia lo hle mai!!

virgochhas said...

i thuziak in min vel...

Naga ho hi ka kawm ve nual tawh a...fel ka ti hlawm khawp mai...rawng an bawl thiam bawk...

may ur frend rest in peace

Mizohican said...

Keipawh college a ka Naga thian tha deuh, best friend pawh tih hial theih, thawveng tawkkkk leh "loyal" bawn tawp in he Khawvel min chawlhsan tawh. An ngaihawm duh khawp mai. May Tlangval Shihoi Bokato Sema rest in peace.

awitei said...

Thrian i ngaih hlut thiam hmel hle mai, keichu ka lak tlak loh tlat, ti lam ah hian, hei tlem a upat ve takah hian ngaih ven nachang ka hre ve ta deuh. Thrian hlut na ka hre ve dawn chauh ni in a lang..

I thlalak tar chu an lung len thlak dun hle mai..I thianpa chu a awmna ah a hlim ngei ka beisei.

samuelapa said...

Thian hi chu tam tak a neih theih a, thian tha tak tak erawh tlem te an ni thin.
1999 khan ka H/S kalpui batchmate-te nen re-union kan nei a. Kum 25 tehmeuh a lo ral tawh a, kan thiante mual liam an lo awm nual tawh nghe nghe a. Chungho zawng zawng chu an chhungte hnenah ralna/hriatrengna kan hlan theuh a. Thil awlai tak a ni lem lo va, mahse, an chhungte leh keimahni tan a hlu ngawih ngawih tih ka hmu. Tun hnuah pawh hian kan thiante boral an awm chuan a remchang apiangin kan chhunzawm ta zel a. Anmahni awm tawh lo mah se, an nupui fanaute leh an chhungte nen inthlunzawmna kan la nei ta zel a, a tha ka ti khawp mai.

vana said...

He post zet chu lairil fantu, hnem rual loh luangliam a ni. A zialo hle mai. Hetiang deuh hi ka tawng tawh a, a hrilhhai thlakzia leh beidawn thlakzia chu. Mahni chauha an thlan a kal tum a awm thin asin. Mahse he khawvelah hain tumah kumhlun tur kan awm si lo, vaivut a siam chu vaivut a kir leh tur kan ni si...

A_es said...

Va xiak lungrunthlak thiam tak em!

Unknown said...

In zavaia chunga in rawn len luh avang leh comments tha tak tak in pek hlawm avangin lawmthu ka sawi e. Tun thla ni 8 khian kan inhmukhawm dawna, a lunglenthlak dawn khawp mai.

burgerstud2005 said...

A va khawngaih thlak reuh ve a...a chhungte chuan a ui ngawt ang.Thisen sang a neih hmel si lo a, damdawi/zu a tih hmel bok si lo a..a va vanduai ve maw le...an hnam lah chu warrior tribe a ni maw...a pa viau ang a...Sema ho hi an hming ah 'to' a tel deuh vekin ka hria.Inato, Akanito...

I thianpa chu a uih awm a nih tak tak hi..a that lai hun leh khawvel taka a par vul lai taka a boral chu..i rilru ah poh i hriat ve reng thin ka ring.Class VIII ka nih laia ka thianpa Laldinpuia poh class VIII nih laiin a thi a, ka hre chhuak fo thin...

chepa said...

Thian kawmngeih takte'n min thihsan hi chuan, rilruah hian theinghil mai hi ahar tak a ni. Ka thian kawmngeih em em ka chan ve nual tawh a, tuntleng hian ka mitthlaah an hmel ka la hmu thin a, ka la ngaituah chhuak fo nia.

Kan thenawma ka thianpa ka sava vehpui, thangkampui, sangha manpui thinin mi thih san te kha a rukin ka tuar nasa ve khawp mai. Tunthleng hian, kan naupan lai a, kan awm dan te kha ka mitthlaah an la cham reng thi. I rilru a i tawrh dan tur chu ka hriatthiampui khawp che mai, i thianpa tan i thil tih pawh i chhuanawm e.

zama (fonz) said...

may he rest in peace

Varte said...

Kei pawh ka thiannu hi Pneumonia vangin a nau nei zo chiah hi a thi a, rilru a na duh asin, naute khawngaihthlak bawk nen, min ngaihtuah chhuahtir zawk mai..

Hmela phu loha nupui fanau i nei tha ang bawkin thian pawh i lo ngaina ve a ni maw?? ka thla i lak kha min lo thawn teh.. (request a nih chu)

Zara Ralte said...

i thuziak chu chhiar anawm rualin a lungchhiat thlak bawk! karhmasa mai khan kei pawh ka roomate hlui in an khua Jamshedpur ah min boral san a thiantha tak te an awm tak loh ah hian rilru ah an awm reng mai. Khawvel hi hetiang hi ani si a:(

Unknown said...
This comment has been removed by the author.